सरकार विघटनको संघारमा !

आम जनताका बीचमा ठूलो आशाको पोको बोकेर आएको भट्टराई नेतृत्व सरकार आफ्नै पार्टीभित्रका सहयात्रीहरुलाई चिडाएर अघि बढ्न खोज्दा विघटनको संघारमा पुगेको छ । सहयात्रीहरुलाई लात्ति मार्दै प्रतिक्रियावादीहरुसंग घाँटी जोड्न पुगेपछि भट्टराईप्रति आशंका पैदा गराएको हो । कुनै पनि हालतमा प्रधानमन्त्री बन्ने मानसिकतामा रहेर भट्टराईले मधेसी मोर्चासंग खतरनाक चारबुँदे सहमति गर्न पुगे । उनकै डिजाइनमा भएको चारबुँदे सम्झौताको बारेमा आफ्नै पार्टी भित्रका वरिष्ठ नेताहरुलाई समेत जानकारी नदिइ भट्टराई एक्लै अगाडी बढ्न खोजे ।

जसले गर्दा पार्टीभित्र अहिले उनलाई धाकेवाज भन्दै सहयात्राको सम्भावना क्षण भएको आवाज उठ्न थालेको छ । भट्टराईले प्रधानमन्त्री बन्नकै लागि मधेसी मोर्चासंग मधेसी युवालाई दश हजारको संख्यामा नेपाली सेनामा भर्ना लिने अन्धाधुन्नध रुपमा नागरिकता बाड्ने जस्ता खतरा सम्झौता गरेका थिए । जसलाई माओवादी वैद्य समूहले राष्ट्रघाति भन्दै खारेजीको माग गरेको छ । उसले यस्ता विषयमा राष्ट्रिय सहमती  हुनुपर्ने भन्दै एक दुई व्यक्तिको चाहनामा यस्तो निर्णय कार्यान्वयन हुन नसक्ने बताएको छ ।

धोविघाट भेलाबाट प्रधानमन्त्री बन्ने अवसर पाएका प्रधानमन्त्री भट्टराईले अहिले त्यही धोविघाट सम्मेलनका सहयात्रीहरुलाई धोका दिएर अमुक व्यक्तिहरुको सल्लाहमा अघि बढेको आरोप उनी माथि लागेको छ l प्रधानमन्त्री भए लगत्तै भट्टराईले सुव्यवस्था कायम राख्न एक महिनासम्म कुनै पनि कर्मचारी सरुवा नगर्ने बताएका थिए । तर, उनको उक्त प्रतिबद्धता तीन हप्ता पनि टिक्न सकेन । अहिले धमाधम कर्मचारी सरुवाको फाइल तयार भइरहेको मन्त्रालय स्रोतहरुले उल्लेख गरेका छन् । सत्ता र शक्तिको लागि जे पनि गर्ने मधेसी दलहरुको समर्थनमा प्रधानमन्त्री भएर राष्ट्रको लागि केही गर्छु भन्ने सपना देख्नु भट्टराईको कमजोरी भएको विश्लेषकहरुले बताएका छन् ।

आफ्नै पार्टीभित्रका सहयात्रीहरुलाई एकठिक्का बनाउन नसक्ने भट्टराईले राष्ट्रिय मुद्दामा सहमति बनाउलान भन्ने कुनै गतिलो आधार नभएको समेत उनीहरुको भनाइ रहेको छ । भट्टराई प्रधानमन्त्री भइसकेपछि उनले लिएका अधिकांश निर्णयहरु विवादमा तानिएका छन् । उनले पछिल्लो समय जनयुद्धको क्रममा किसानले कब्जा गरेका जमिनदारका जग्गा बिना नीति फिर्ता गर्न दिएको निर्देशन बढी आलोच्य बनेको छ । किसानका समस्या नबुझि हचुवाको भरमा जग्गा फिर्ता गराउने सरकारको निणर्य घातक हुने भन्दै माओवादीका एक वरिष्ठ नेताले  जग्गा कब्जाको लागि सहिद बनाइयो अब जग्गा फिर्ता गर भन्नेका विरुद्ध लडे त सहिद बनाउने काम भएको भन्दै चर्को आलोचना गरेका छन् ।

भूमिहिन जनतामाथि अत्याचार गरेर सरकारले पार्टी नीति विपरित कार्य गरेको समेत तीन नेताले बताए । आफ्नै पार्टीभित्रका सहयात्री, पार्टीको नीति अनि हिजो जनताका अगाडि गरेका वाचाहरु भुल्दै गएपछि भट्टराई नेतृत्वको सरकारप्रति जनआक्रोश बढ्दै गएको जानकारहरुले बताएका छन् । सरकार मुख्य एजेण्डा भन्दा ज्यादा प्रचारवाजीमा लागेपछि हिजोका मुद्दा ओझेलमा परेको प्रति माओवादी नेता कार्यकर्ताहरुले समेत आक्रोश पोखेका छन् ।

पार्टीभित्रका योजना विपरित व्यक्तिगत ढंगले अगाडि बढ्न खोजेपछि भट्टराई नेतृत्वको सरकार विघटनको संघारमा पुगेको छ । आफ्नै पार्टीभित्रको असहयोग कारण भट्टराई नेतृत्वको सरकार बालुवाको घरमा परिणत भएको भन्दै जानकारहरुले यो जुनसुकै बेला ढल्न सक्ने बताएका छन् ।

Tweet